正生校長紅到開專欄 免費報睇中 稿費撥正生
(明報)2009年6月24日 星期三 05:05
【明報專訊】有招牌鬍鬚嘅正生書院校長陳兆焯,近排成為紅人,上報紙、上電視、上電台不特止,更畀免費報紙睇中,被提拔為專欄作家,下周一起每星期登稿一篇。陳校長透露,專欄內容都係以介紹正生書院為主,所有稿費會撥作正生經費。陳校長話,近日愈來愈多人對正生嘅辦學理念感興趣,佢都希望更多人認識正生,故與該份免費報章一拍即合,將正生鮮為人知嘅故事,例如為何每堂長半小時、為何要狂操數學題等,一五一十話畀讀者知。
周五舉行論壇 不談遷校
陳校長又話,正生書院學生將於禮拜五晚,喺灣仔溫莎公爵大廈大禮堂舉行論壇,歡迎所有感興趣嘅市民出席。問佢有沒有邀請鄉議局代表?陳校長話:「呢個唔係造勢大會,唔想搞到政治化。」陳校長講明在先,當晚只會談及正生嘅教學,遷址一事將隻字不提。
----------------------------------------------------------------------------------------------------------
各位撐定反正生書院遷校梅窩?